Туршлагын нэр: “Би ялна”
Өвөрхангай аймгийн Уянга сумын ЕБ-ын 1-р сургууль
Багшийн товч мэдээлэл: Технологийн багш Б.Алтанцэцэг
Хүүхдийн бэрхшээл болон анги нийтэд үүсгэдэг асуудлууд:Сурагч Л нь 9-р ангид сурдаг, 15 настай, чихрийн шижин хүнд хэлбэр G-10
Манай ангийн сурагч Л нь анх 2021 оны 09 дүгээр сарын 29-ны өдөр гэртээ ухаан алдаж эмнэлэгт хүргэгдэн шинжилгээ өгч “Чихрийн шижин хүнд хэлбэр G-10” гэж оношлогдон сум, аймгийн эмнэлэгт хэвтэн эмчлүүлсэн боловч биеийн байдал хүндрэн Эх нялхсын үндэсний төвд хэвтэн эмчлүүлж эхэлсэн.
Эмчилгээний явцад хоолны дэглэм, бие махбодын өөрчлөлт, 1 сарын дотор 10кг жин хаясан нь хүүхдийн сэтгэл зүйн байдал нөлөөлж тогтворгүй, уур уцаартай болж байгаа нь эцэг эх, багш, анги хамт олонд анзаарагдаж байсан. Сурагч Л нь сахрын хэмжээ ихсэж, хэт их ачаалал авсан, ядарсан, нойр муутай үедээ чичрүүлэх, бие нь салганаж, сэтгэл зүй нь тогтворгүй болдог. Өөрийн шийдвэрийг бусдад тулгах, намайг сонсохгүй байна гэж уурлаж бухимдаж эмзэг болдог.
Дэмжих арга 1. Хичээе, хөгжьеСурагч Л-ын сэтгэл зүйн тогтворгүй байдлыг өөрчлөх бусадтай хамтран ажиллах бусдын санаа бодлыг сонсож өөртөө итгэлтэй байх чадварын сайжруулах зорилгоор онцлогт нь тохирсон бие даан гүйцэтгэх ажил даалган үнэлгээ дүгнэлт өгч ажиллав.
Ажиглагдсан үр дүн: Урлагийн үзлэгийн дүр тоглолтыг найруулах зохиох, аяыг эвлүүлэх, нэгтгэх гэх мэт үүрэг даалгавар сайн гүйцэтгэн анги хамт олноо удирдан чиглүүлэн амжилттай оролцдог.
Дэмжих арга 2. Оролцоод хөгжьеМөн спортын тэмцээнд оролцох үед тухайн өдрийн эмчилгээг тасалдуулахгүй байх боломжийг бүрдүүлж завсарлага авч, цагийг зохицуулан тэмцээн уралдаанд бүрэн хамруулж анги нийтийн болон бусад тэмцээнд уралдаанд сонирхлыг нь дэмжин ажилласнаар өөртөө итгэх итгэл нэмэгдэж сэтгэл санааны байдалд сайнаар нөлөөлж байна. Түүний ахлан зохион байгуулсан ажлаас дурдвал:Эгшиглэн - 2022 урлагийн наадамд насны ангилалдаа тэргүүн байр,Алтан намар спортын тэмцээнд ангиараа тэргүүн байр,Сургуулийн аварга шалгаруулах гар бөмбөгийн тэмцээнд эрэгтэйчүүд тэргүүн байр, охид дэдбайр,
Сурагч Л сургуулийн гар бөмбөгийн шигшээ багт хичээллэдэг бөгөөд сургуулиа төлөөлөн аймгийн аварга шалгаруулах тэмцээнд амжилттай оролцсон.Дэмжих арга 3. Ойлгож, дэмжьеАнгийн сурагчид чихрийн шижин өвчний талаар мэдлэггүй, сурагч Л нь ангийнхантайгаа нийлж хооллолтын дэглэм зөрчих асуудал гарч байсан тул сургуулийн эмчтэй хамтран тус өвчний талаарх сургалтыг зохион байгуулж хооллолтын дэглэм зөрчвөл гарч болох эрсдэлийг ойлгуулснаар найзууд нь түүнийг ойлгож, дэмжиж сэтгэл зүйд гарч байгаа өөрчлөлтүүдийг хамтдаа даван туулах талаар ярилцдаг болсон.
Хүүхдэд гарсан тодорхой эерэг өөрчлөлт:Сурагч Л нь сэтгэл зүй, биеийн байдал тогтворжиж, сургалт үйл ажиллагаанд идэвх санаачилгатай оролцож зарим тохиолдолд найзуудаа гэртээ урьж даалгавраа хамтарч хийх, чөлөөт цагаа хамт өнгөрөөдөг болсон төдийгүй сургуулийн гар бөмбөгийн секцэд явж сахрын хэмжээг хөдөлгөөнөөр
бууруулах аргад суралцаж тогтмол хичээллэх дадал хэвшүүлснээр анх сахрын хэмжээний хэлбэлзэл 30 болон тестийн хэмжүүр даваад “HI” заадаг байсан бол сүүлийн нэг жил тогтворжиж дунджаар 10 болж буурсан.
Ээжийн сэтгэгдэл: “Миний хүү чихрийн шижин өвчнөөр өвчилсөн нь хүүд минь болон манай гэр бүлд хүндээр нөлөөлсөн. Өвчнөө даван туулахад ангийн багш болон найзууд нь үргэлж хамт байж, суралцах, хөгжих боломж бүрдүүлж байдагт баярлаж байна. Сургуулийн эмч болон биеийн тамирын багш, ангийн багш нар хамтран дасгал хөдөлгөөн хийж, өөрийн дуртай спортоороо тогтмол хичээллэх зөвлөмж өгч, гар бөмбөгийн спортоор хичээллүүлсэн нь хүүгийн маань бие махбодод болон сэтгэл санаанд эергээр нөлөөлж, өвчнөө даван туулах эрч хүч өгдөг болсон. Одоогийн байдлаар хүүгийн маань сахрын хэмжээ маш ихээр буурч байгаа. Энэ бүхэн сургуулийн захиргаа болон ангийн багш, хамт олон нь бүгдээрээ миний хүүг дэмжиж тусалсны ач учраас чин сэтгэлээсээ баярлалаа.”
Төстэй мэдээ