“СУРАЛЦАГЧИЙН ҮНЭЛГЭЭНИЙ АРГА ЗҮЙ” СУРГАГЧ БАГШ БЭЛТГЭХ СУРГАЛТ ЭХЭЛЛЭЭ
Ерөнхий боловсролын сургуулийн суралцагчийг үнэлэх багшийн мэдлэг, чадварыг сайжруулах зорилгоор “Ковид-19”-ийн дараах Боловсролын сэргэлтийг дэмжих (ТТ6869 Mon) төслийн хүрээнд "Суралцагчийн үнэлгээний арга зүй" үндэсний хэмжээний 130 сургагч багш бэлтгэх 3 өдрийн сургалт 2024 оны 03 дугаар сарын 25-ны өдрөөс МУБИС-ийн хичээлийн В байр буюу Математик, Байгалийн ухааны сургууль дээр эхэллээ.Сургалтад аймаг бүрээс 2 мэргэжилтэн, нийслэлийн Боловсролын газар, төрийн өмчийн ерөнхий боловсролын сургуулийн сургалтын менежер, бага боловсрол, түүх-нийгмийн ухаан, байгалийн ухаан, математик, дизайн технологи, дүрслэх урлаг, газарзүй, мэдээллийн технологи болон бусад судлагдахууны багш нар хамрагдаж байна.Сургагч багшаар бэлтгэгдэж буй багш, мэргэжилтнүүд 24 цаг буюу 3 модуль багц цагийн сургалтад танхимаар хамрагдсаны дараагаар онлайн сургалтад үргэлжлүүлэн хамрагдаж сургалтын модулийг бүрэн үзэж, даалгавраа гүйцэтгэсний дараагаар 21000 мянган багшид тус сургалтыг онлайнаар зохион байгуулах юм.Сургалтыг Монгол улсын гавьяат багш, боловсрол судлалын доктор, үнэлгээний үндэсний хэмжээний зөвлөх Н.Оюунцэцэг, МУБИС-ийн доктор, үнэлгээний үндэсний хэмжээний зөвлөх Г.Баярмаа нар болон үндэсний хэмжээний зөвлөх багш нар удирдан зохион байгуулж байна.
Төстэй мэдээ