Туршлагын нэр: Сонсголын бэрхшээлтэй хүүхэдтэй ажиллах арга
Дорноговь аймгийн Замын-Үүд сумын ЕБ-ын 1-р сургууль
Багшийн товч мэдээлэл: Түүх, нийгэм судлал, иргэний ёс зүйн боловсролын багш Р.Батчимэг
Хүүхдийн бэрхшээл болон анги нийтэд үүсгэдэг асуудлууд:Сурагчид дунд ангид сурдаг юм. Сонсголын бэрхшээлтэй.
Сурагч1: Үг дуу цөөнтэй, бичих чадвар сайн, зураг зурах дуртай, үсэг, тоо ялгаж чадна, унших чадвар сул хөгжсөн. Анги хамт олонтойгоо нийтэч. Монгол бичгээр бичих чадвар сайн. Дугуй унах дуртай. Сонсголын бэрхшээлээсээ болоод заримдаа үл ойлголцох, өөрийнхөө бодол санааг илэрхийлж чадахгүй байх асуудал үүсдэг. Сурагч2: Ярих чадвар хөгжиж байгаа, бичих чадвар сайн, зураг зурах дуртай, үсэг, тоо ялгаж чадна унших чадвар сайн. Анги хамт олонтойгоо нийтэч. Шатар, даам сайн тоглодог. Аливаа зүйлийг заахдаа удаан ярьж тайлбарлавал сайн ойлгоно. Хоёр чих бага зэрэг сонсголтой учраас сурагч 1 нь сурагч 2-тоо тайлбарлаж өгдөг.Тэдний хувьд хоорондоо маш сайн ойлголцож ярилцдаг. Бие биедээ чаддаг хичээлээ тайлбарлаж өгдөг. Хичээл тус бүрийн даалгавар болон унших, бичих, зурах зүйлийг нь тайлбарлаж өгвөл өгсөн үүрэг даалгаврыг цаг тухай бүрд нь тогтмол хийдэг.
Дэмжих арга 1. Танин мэдэхүй, уран зохиолын ном уншуулахАжиглагдсан үр дүн: Номын хэсгээс ойлгосон зүйлээ зураг болон бичгээр илэрхийлдэг. Зарим номынхоо хэсгээс өөрийн ойлгосон зүйлээ ярьж өгдөг. Ингэснээр унших, бичих чадвар сайжирсан.
Дэмжих арга 2. Дугуй ширээний ярилцлага хийхАжиглагдсан үр дүн: Хоёр сурагчтай 14 хоногтоо нэг удаа хичээл болон өөрсдийгөө хөгжүүлэх бусад зүйлийн талаар хамтарч ярилцдаг. Хэл ярианы чадвар хөгжиж байгаа.
Дэмжих арга 3. Тоглоомын аргаар сурган хүмүүжүүлэх, багаар хамтарч ажиллахАжиглагдсан үр дүн: Багш, анги хамт олонтойгоо хамтарч тоглох, багаар даалгавар хамтарч хийх. Хөгжөөнт тоглоом тоглох. Ингэснээр анги хамт олонтойгоо нийтэч болох багаар хамтран ажиллах чадвар сайжирч нийгмийн харилцаанд чөлөөтэй оролцож сурч байна.Хүүхдэд гарсан тодорхой эерэг өөрчлөлт:• Анги хамт олонтойгоо чөлөөтэй харилцдаг
• Багаар хамтарч ажиллах чадвар сайжирсан
• Ном унших дуртай болсон
“Манай ангийн багш бид хоёртой аль болох ярилцаж, маш их зүйл асууж, тулгамдаж буй асуудлыг маань шийдвэрлэхийг хичээдэг. Хичээлийн бусад цагт бид хоёрт зориулж хамтарч ном уншдаг. Сонирхолтой номын талаар ярилцдаг. Бид нарт олон гоё зурах зураг хэвлэж өгдөг” хэмээн ихэр охид сэтгэгдлээ илэрхийлсэн бол тэдний ээж “АУБ Р.Батчимэг нь манай хүүхдүүдтэй тулж ажилладаг. Дунд ангид орсноосоо хойш хүүхдүүд маань гэртээ өөрийгөө илэрхийлэх чадвар сайжирч байгаа. Хичээл номдоо дуртай болсон” гэжээ.
Төстэй мэдээ