Боловсролын ерөнхий хуулийн 24.1.4, Дээд боловсролын тухай хуулийн 7.3,10.2, Мэргэжлийн болон техникийн боловсрол, сургалтын тухай хуулийн 9.2, 9.12, Төрийн болон орон нутгийн өмчийн тухай хуулийн 9.5-д заасныг тус тус үндэслэн Монгол Улсын Засгийн газраас ТОГТООХ нь:
1.Их сургуулийг сургалт-эрдэм шинжилгээ-үйлдвэрлэлийн цогцолбор хэлбэрээр хөгжүүлэх, шатлан суралцах тогтолцоог бүрдүүлэх ажлыг эрчимжүүлэх зорилгоор мэргэжлийн болон техникийн боловсролын сургалтын дараах байгууллагыг төрийн өмчийн их сургуулийн харьяа политехник коллеж болгон доор дурдсанаар өөрчлөн байгуулсугай:
1.1.Хөвсгөл аймаг дахь политехник коллежийг Шинжлэх ухаан, технологийн их сургуулийн харьяа Хөвсгөл аймаг дахь политехник коллеж болгон;
1.2.Монгол Улсын их сургуулийн Худалдааны сургуулийн Мэргэжлийн сургалт-үйлдвэрлэлийн төв, Шинжлэх ухаан, технологийн их сургуулийн Үйлдвэрлэлийн технологийн сургуулийн Ой модны сургалт, судалгааны дэргэдэх Мэргэжлийн сургалт-үйлдвэрлэлийн төв, Шинжлэх ухаан, технологийн их сургуулийн Механик тээврийн сургуулийн Мэргэжлийн сургалт-үйлдвэрлэлийн төвийг нэгтгэн Шинжлэх ухаан, технологийн их сургуулийн харьяа Политехник коллеж болгон;
1.3.Өмнөговь аймаг дахь Политехник коллежийг Шинжлэх ухаан, технологийн их сургуулийн Өмнөговь аймаг дахь Технологийн дээд сургуулийн харьяа Политехник коллеж болгон;
1.4.Сэлэнгэ аймаг дахь Мэргэжлийн сургалт-үйлдвэрлэлийн төв, Шаамар сум дахь Мэргэжлийн сургалт-үйлдвэрлэлийн төвийг нэгтгэн Хөдөө аж ахуйн их сургуулийн харьяа Сэлэнгэ аймаг дахь Политехник коллеж болгон;
1.5.Булган аймаг дахь Мэргэжлийн сургалт-үйлдвэрлэлийн төв, Хөдөө аж ахуйн мэргэжлийн сургалт-үйлдвэрлэлийн төвийг нэгтгэн Хөдөө аж ахуйн их сургуулийн харьяа Булган аймаг дахь Политехник коллеж болгон;
1.6.Төв аймгийн Заамар сум дахь Мэргэжлийн сургалт-үйлдвэрлэлийн төвийг Хөдөө аж ахуйн их сургуулийн харьяа Төв аймаг дахь Политехник коллеж болгон;
1.7.Үндэсний батлан хамгаалахын их сургуулийн Цэргийн нэгдсэн дээд сургуулийн харьяа Батлан хамгаалахын мэргэжлийн сургалт-үйлдвэрлэлийн төвийг Үндэсний батлан хамгаалахын их сургуулийн харьяа Батлан хамгаалахын политехник коллеж болгон;
1.8.Орхон аймаг дахь мэргэжлийн сургалт-үйлдвэрлэлийн төв, Хөдөө аж ахуйн мэргэжлийн сургалт-үйлдвэрлэлийн төвийг нэгтгэн Орхон аймаг дахь Политехник коллеж болгон;
1.9.Дархан-Уул аймаг дахь Политехник коллеж, Дархан-Өргөө политехник коллеж, Уул уурхай, эрчим хүчний политехник коллежийг нэгтгэн Дархан-Уул аймаг дахь Политехник коллеж болгон.
2.Дорнод аймаг дахь Мэргэжлийн сургалт-үйлдвэрлэлийн төвийг тус аймаг дахь Политехник коллежид нэгтгэсүгэй.
3.Шинжлэх ухаан, технологийн их сургуулийн дэргэдэх Технологийн коллежийг (коосэн) Шинжлэх ухаан, технологийн их сургуулийн харьяа Технологийн коллеж болгон өөрчлөн байгуулсугай.
4.Соёл, урлагийн их сургуулийн харьяанд мэргэжлийн боловсролын сургууль байгуулсугай.
5.Шинжлэх ухаан, технологи, инновацын өндөр мэргэжлийн хүний нөөцийг бэлтгэх, үндэсний чадавхыг бэхжүүлэх, тэргүүлэх мэргэжлийн чиглэлээр салбар дундын судалгаа, хөгжүүлэлтийн ажлыг эрчимжүүлэх зорилгоор Шинжлэх ухааны академи болон төрийн өмчийн эрдэм шинжилгээний хүрээлэн тэдгээрийн материаллаг бааз, хүний нөөцөд түшиглэн төрийн өмчийн их сургуультай хамтарсан ахисан түвшний дээд боловсролын сургалтын байгууллага байгуулах асуудлыг судлан үзэж Засгийн газрын хуралдаанд танилцуулахыг Боловсрол, шинжлэх ухааны сайд Л.Энх-Амгаланд даалгасугай.
6.Инженер, технологи, хөдөө аж ахуйн чиглэлээр шатлан суралцах боломж бүрдүүлэх зорилгоор Технологийн коллежийн (коосэн) хөтөлбөрийг эхний ээлжид орон нутаг дахь төрийн өмчийн их сургуульд шаталсан сургалтын хэлбэрээр хэрэгжүүлэх, хөтөлбөрийн судалгаанд шаардагдах зардлыг 2024 оны улсын төсвийн төсөлд тусгахыг Боловсрол, шинжлэх ухааны сайд Л.Энх-Амгаланд даалгасугай.
7.Хөдөө аж ахуйн их сургуулийн харьяа Сэлэнгэ аймгийн Шаамар сум дахь Политехник коллежийн харьяанд Хөдөө аж ахуй, газар тариалангийн дундын дадлагын бааз, Дархан-Уул аймаг дахь Политехник коллежийн харьяанд Техник, технологийн дундын дадлагын бааз ажиллуулах, холбогдох зардлыг батлагдсан төсвийн хүрээнд шийдвэрлэхийг Боловсрол, шинжлэх ухааны сайд Л.Энх-Амгаланд даалгасугай.
8.Төрийн өмчийн боловсролын сургалтын зарим байгууллагыг өөрчлөн байгуулсантай холбогдуулан 2023-2024 оны хичээлийн жилд багтаан дараах арга хэмжээг авч хэрэгжүүлэхийг Монгол Улсын Шадар сайд бөгөөд Эдийн засаг, хөгжлийн сайд Ч.Хүрэлбаатар, Сангийн сайд Б.Жавхлан, Боловсрол, шинжлэх ухааны сайд Л.Энх-Амгалан, Байгаль орчин, аялал жуулчлалын сайд Б.Бат-Эрдэнэ, Батлан хамгаалахын сайд Г.Сайханбаяр, Хөдөлмөр, нийгмийн хамгааллын сайд Х.Булгантуяа, Хүнс, хөдөө аж ахуй, хөнгөн үйлдвэрийн сайд Х.Болорчулуун, Төрийн өмчийн бодлого, зохицуулалтын газар (Б.Цэнгэл)-т тус тус даалгасугай:
8.1.өөрчлөн байгуулсан мэргэжлийн болон техникийн боловсролын сургалтын байгууллагад багшлах хүний нөөцийг хөгжүүлэх, багш, ажилтныг ажлын байраар хангах, шилжүүлэн ажиллуулах, хуульд заасан нийгмийн баталгааг хангах арга хэмжээг авч хэрэгжүүлэх;
8.2.өөрчлөн байгуулсан мэргэжлийн болон техникийн боловсролын сургалтын байгууллагын орон тоо, төсөв, өмч, эд хөрөнгийг зохих журмын дагуу шилжүүлэх арга хэмжээг зохион байгуулах;
8.3.өөрчлөн байгуулсан мэргэжлийн болон техникийн боловсролын сургалтын байгууллагын 2023 оны үйл ажиллагааны зардал болон суралцагчдад олгох тэтгэлгийг батлагдсан төсвийн хүрээнд холбогдох зохицуулалт хийх, цаашид жил бүрийн улсын төсвийн төсөлд тусгах.
9.Монгол Улсын урт, дунд, богино хугацааны хөгжлийн бодлого, бүс нутгийн хөгжлийн чиг хандлага, эдийн засгийн бүтэц, хөдөлмөрийн зах зээлийн эрэлт, хэрэгцээнд нийцүүлэн мэргэжлийн болон техникийн боловсролын сургалтын байгууллагыг төрөлжүүлэн хөгжүүлэх, менежментийг боловсронгуй болгох, сургалтын уян хатан шаталсан тогтолцоог бүрдүүлэх цогц арга хэмжээ авч хэрэгжүүлэхийг Боловсрол, шинжлэх ухааны сайд Л.Энх-Амгаланд даалгасугай.
10.Энэ тогтоол гарсантай холбогдуулан "Хөдөө аж ахуйн техникийн мэргэжлийн боловсон хүчнийг бэлтгэх арга хэмжээний тухай" БНМАУ-ын Сайд нарын Зөвлөл ба Монгол Ардын Хувьсгалт Намын Төв Хорооны 1957 оны 8 дугаар сарын 24-ний өдрийн 364/277 дугаар тогтоолын а/ заалтын "Шаамар" гэснийг, "Барилгын техник мэргэжлийн сургууль байгуулах тухай" БНМАУ-ын Сайд нарын Зөвлөлийн 1964 оны 5 дугаар сарын 27-ны өдрийн 265 дугаар тогтоолын 1 дэх хэсгийн а/ заалтын "Дорнод" гэснийг, мөн тогтоолын б/ заалтыг, "Техник-мэргэжлийн сургууль байгуулах тухай" БНМАУ-ын Сайд нарын Зөвлөлийн 1984 оны 3 дугаар сарын 2-ны өдрийн 49 дүгээр тогтоолын 1 дэх заалтын "Дархан" гэснийг тус тус хассугай.
11.Энэ тогтоол гарсантай холбогдуулан "Техник мэргэжлийн сургууль байгуулах тухай" БНМАУ-ын Сайд нарын Зөвлөлийн 1972 оны 6 дугаар сарын 1-ний өдрийн 326 дугаар тогтоол, "Барилгад чанарын удирдлагыг бэхжүүлэх зарим арга хэмжээний тухай" БНМАУ-ын Сайд нарын Зөвлөлийн 1976 оны 7 дугаар сарын 2-ны өдрийн 20 дугаар тогтоол, "Мэргэжлийн сургалт үйлдвэрлэлийн төв байгуулах тухай" (Орхон, Булганд) Засгийн газрын 2011 оны 7 дугаар сарын 6-ны өдрийн 218 дугаар тогтоолын 1 дэх заалтыг, "Төрийн өмчийн зарим мэргэжлийн боловсрол, сургалтын байгууллагыг өөрчлөн байгуулах тухай" Засгийн газрын 2013 оны 5 дугаар сарын 4-ний өдрийн 161 дүгээр тогтоолын хавсралтын 2 дахь хэсгийг, "Төрийн өмчийн зарим боловсролын сургалтын байгууллагын талаар авах арга хэмжээний тухай" Засгийн газрын 2022 оны 8 дугаар сарын 3-ны өдрийн 293 дугаар тогтоолын 1.3 дахь заалтыг тус тус хүчингүй болсонд тооцсугай.
МОНГОЛ УЛСЫН ЕРӨНХИЙ САЙД Л.ОЮУН-ЭРДЭНЭ
БОЛОВСРОЛ, ШИНЖЛЭХ УХААНЫ САЙД Л.ЭНХ-АМГАЛАН